SITUS INI MILIK NAGARI ANDALEH

PIDATO
MAMPASAMBAHKAN SIRIAH

Kaganti rokok nan sabatang
Tukaran sirih nan sakapua
Kaguno bajawek tangan

Assalamu’alaikum warah matullahi wabarakatuh

Jan salam salam disambah
Samo mandoa kapado Allah
Samo salawat kapado Nabi
Junjungan sagalo Alam

Manyurek di ateh pintu
Mangarang di tapak tangan
Malompek nak basitumpu
Mancancang nak balandasan
Di Datuak tibonyo sambah

Manolah Datuak janyo hambo

Sakali hambo mahimbau
Sapatah rundiang nan lalu
Walaupun Sutan saurang nan tahimbau
Batin dek adat kasadonyo

Pangana batin ka nan rapek
Ujuiknyo sambah ka nan banyak
Sambah sujuik salam tasimpuah
Saarek bungka nan piawai
Naraco luruih main daun

Indak basibak jo basisiah
Bukan bahinggo jo babateh
Sambah tajelo ka nan rapek
Kapado sagalo nan taduduak ateh majelih nangko

Ninik mamak panghulu Pamangku Adat
Nan Gadang basa Batuah
Ibarat kayu baringin di tangah koto.
Ureknyo limbago matan
Babatang sandi andiko
Badahan cupak jo gantang
Barantiang barih balabeh
Babungo mungkin jo patuik
Badaun rimbun dek adat
Babuah kato nan bana
Inggiran silang jo salisiah
Daun rinbun tampek balinduang
Bakeh bataduah kahujanan

Alim ulama suluah bendang
Suluah nan tarang di nagari
Nan tahu di halal dengan haram
Tahu di syah dengan batal

Nan pandai balapa ba maana
Tahu di syariat jo hakikat
Bakeh batanyo lahia jo batin
Nan tahu di hadis dengan dalil

Cadiak pandai pagaran kokoh
Nan tahu di runciang ka mancucuak
Sarato onak ka manyangkuik
Tahu di angin nan basiwik
Sarato ombak nan basabuang
Tahu di alamat kato sampai
Tahu di raso jo pareso
alun bakilek lah bakalam
Bulan lah sangkok tigo puluah
Balun diliek lah dimakan
Raso lah tibo dalam tubuah

Takilek ikan dalam aie
Ikan takilek jalo tibo
Lah tantu jantan batinonyo
Itulah kilek dengan bayang

Nan mudo pambimbiang dunia
Nan capek kaki ringan tangan
Capek kaki indak panaruang
Ringan tangan bukan pamacah

Aso tarantang duo sudah
Nan bahati suci bamuko janiah
Ayam nan tangkeh di galanggang
Ancang-ancang dalam nagari

Kapado sagolo Bundo Kanduang
Limpapeh rumah nan gadang
Amban paruak pegangan kunci
Amban puruak aluang bunian

Hiasan anjuang nan tinggi
Sumarak kampuang jo halaman
Sumarak koto jo nagari
Sumangek rumah jo tanggo

Kok hiduik tampek banaza
Kok mati tampek baniat
Ka unduang-unduang ka Madinah
Ka payuang panji ka sarugo

Ujuik sambah nan taunjuak
Nyato tawalak ka ukuran
Tabayang barih jo balabeh
Nyato bak andai kato bida

Dek curiang barih dahulu
Dek andai pusako lamo
Kalau basiang dinan tumbuah
Jikok manimbang dinan ado
Tumbuah sarupo iko kini

Manuruik papatah cupak gantang
Dek banyak ragu kok tibo
Dek lamo lupo kok datang
Manusia basifat khilaf
Agak jo ragu juaronyo

Nan tinggi kok kurang anjuang
Nan gadang kok kurang ambah
Sabab dek sasak dengan sampik
Aluran di ateh kok di bawah
Patuik di tangah kok di tapi

Kok kurang sanang sajahtaro
Kok kurang aman jo santoso
Disusun jari nan sapuluah
Ditakua kapalo nan satu
Maaf diminta banyak-banyak
Izin jo rela dari Datuak

Limbak nan daripado itu
Adat nan duo salanggano
Cancang nan duo salandasan

Puntiang talantak ka hulu
Dibawah kiliran taji
Asa rundinag kato dahulu
Tigo limbago nan tajadi
Partamo sambah manyambah
Kaduo baso jo basi
Katigo sirieh jo pinang

Sambah manyambah dalam adat
Tali batali undang-undang
Tasabuik bamuluik manih
Tapakai baso jo basi
Sarato hereng dengan gendeang

Muluik manih pangarang baso
Budi baiak tali pikatan
Iyo carano rang namokan
Kiasan Alam Minangkabau

Ramo-ramo tabang malayang
Malayang ka Koto Tangah
Banyaknyo ampek puluah ampek
Indah carano bukan kapalang
Talatak di tangah-tangah
Dilingkuang urang nan rapek

Itu carano pulang pai
Dari sipakok ka panggilan
Dari pangka lalu ka ujuang
Talayok ka ruang tangah
Talayang ka ruang tapi
Sampai tabujua di lintangi
Nyato taunjuak bakeh Datuk
Tibo di muko nan basamo

Carano banamo Carano Basa
Datang nan dari tanah Banja
Buatan tukang Reno Ali
Buatan tukang Sungai Pua

Elok carano bukan kapalang
Carano bak tiuang ka tabang
Baukia bamego-mego
Batata bapucuak rabuang
Panuah barisi kalangkapan
Limo bak bilangan jari
Kaganti baso jo basi

Apolah jinih kalangkapan
Partamo sadah kaduo sirieh
Katigo pinang kaampek Gambia
Nan kalimo adolah timbakau

Lorong kapado dang sadahnyo
Sadahnyo langkitan gadang
Dibasuah jo aie ambun
Babasuah jo pati santan
Dihambuih jo lingka Cino
Dikipeh jo ambi-ambi
Putiah nan bak banak dalam
Dipalik jo jari manih
Bakisa ka jari tangah
Mambayang ka tapak tangan
Usah ka usak makin panuah
Itulah kato bakiasan

Tanamo urang Minangkabau
Manyambah Tuhan nan Aso
Sumbayang limo wakatu
Adat basandi syarak
Syarak basandi Kitabullah
Syarak mangato adat mamakai

Lorong kapado daun siriehnyo
Kiasan takanduang di dalamnyo
Adat bagaua dalam hiduik
Mamakai budi nan baiak

Siriehnya udang tampak hari
Sirieh timbalan kuku balam
Gagangnyo bapantang putuih
Buahnyo diambiak ka tinaman

Daun diambiak ka kusuak mandi
Usah ka ratak rintiah tido
Usah ka layua makin hiduik
Itulah budi dengan malu

Nan tuo di hormati
Nan ketek dikasihi
Samo gadang bawok bakawan
Nan gadang jan malendo
Nan panjang jan malindeh

Lorong kapado nan pinangnyo
Pinang batuntak jo batuntun
Bak bawang dibalah duo
Bak dasun dibalah ampek

Kiasan takanduang di dalamnyo
Salamo hiduik di dunia
Barek samo dipikua
Ringan samo dijinjiang
Saciok umpamo ayam
Sadanciang ibarat basi
Sakato lahia jo batin
Sasuai muluik jo hati

Iyo sakabek nan bak lidih
Nyato sarumpun nan bak sarai
Iyo salubang nan bak tabu
Elok saikek nan bak sirieh

Lorong kapado nan gambianyo
kaba barito kami danga
Buatan Puti Sarilamak
Sapipiah jatuah ka sirieh
Mambayang sampai ka muko

Sirahnyo tampak di bibia
Lamaknyo tingga di rangkuangan
Parisonyo maruang tubuah
Sehat anggoto katujuahnyo
Kato bakieh baibarat
Kiasan takanduang di dalamnyo
Duduak sorang basampik-sampik
Duduak basamo balapang-lapang
Kato surang dibulati
Kato basamo dipaiyokan

Dibulekkan aie ka pambuluah
Dibulekkan kato ka mupakat
Bulek baru di golekkan
Pipiah baru dilayangkan

Buleknyo indak basuduik
Kok picaknyo indak basandiang
Data bak lantai papan
Licin bak dindiang camin
Tapauik makanan lantak
Takuruang makanan kunci

Lorong kapado nan santonyo
Huluih sayiknyo dek maracik
Banamo timbakau Jawo
Racik tukang dari Piobang
Saheto panjang jaluanyo
Harum satahun pajalanan

Kiasan takanduang di dalamnyo
Adat hiduik di Minangkabau
Jauah jalang manjalang
Dakek cinto mancinto
Kok rusuah iyo bapujuak
Tagamang nyato bajawek
Hanyuik patuik dipintesi

Tarapuang nyato bakaik
Kok condong iyo batungkek
Lamah makanan tungkek
Nan panjang makanan Karek
Nan singkek makanan uleh

Nan ado samo dimakan
Nan indak samo dicari
Mandapek samo balabo
Kahilangan samo marugi

Hati gajah samo dilapah
Hati tungau samo dicacah
Kok kurang tukuak manukuak
Senteng bilai mambilai

Malangkah di ujuang karih
Basilek di pangka padang
Kato adat salalu baumpamo
Rundiang salalu bakiasan

Didalam adat nyato basuo
Papatah patitih mangatokan
Pituah kato pusako
Pusako ninik moyang nan dahulu

Gulamo mudiak ka hulu
Mati disemba ikan tilan
Kanailah anak bada baling
Pusako ninik mamak nan dahulu
Kini manjadi undang-undang

Manolah Datuak janyo hambo

Dek alua manantang bana
Dek luruih tujuan kato
Ibarat saluang pauleh angok
Titian aie polongan asok

Dari ninik dengan mamak
Sipokok alek nan punyo kato
Nan sakarang kini nangko
Nak sampai niat jo mukasuik
Ujuik paham nak nyo jaleh
Sadang kutiko bungo kambang
Sirieh sahalai nak bacabiak
Pinang sabuah nak bagatok

Gambia sabuah nak bapipia
Sadah di cupu nak bapalik
Rokok sabatang iyo baisok
Sirieh sakapua rang namokan

Tanam sirieh tanamlah pinang
Tanam karakok di halaman
cabiak sirieh gatoklah pinang
Giliang rokok pamenan tangan
Itulah jinih sambah kami

Sambah alah salam lah tibo
Kato bana sungguah di bari
Harapan kami nan basamo
Barabah sadundun dengan balam
Sikok barulang pai mandi
Sambah sadundun dengan salam
Kato dimintak babunisi
Sakian sambah pado Datuak.
(nagariandaleh@yahoo.co.id)